– gronda cumpetenza da linguas

La SAPGR, la scola auta da pedagogia dal Grischun, scolescha persunas d’instrucziun per la scolina e la scola primara en tut las trais linguas chantunalas: tudestg, talian e rumantsch. Quai è unic en Svizra. La SAPGR è reconuschida en Svizra ed è ina da las pitschnas scolas autas da pedagogia, cun radund 250 studentas e students. Dal 2006 ha l’emprima annada retschavì il diplom da scolastas e scolasts e cun quai era cuntanschì il nivel da Bachelor.

La SAPGR n’è betg mo responsabla per la scolaziun da basa pedagogica. Il chantun incumbensescha la SAPGR era cun la realisaziun da curs da perfecziunament e per qualificaziuns supplementaras per cumplettar l’abilitad d’instruir en singuls roms e cun qualificaziuns supplementaras per la pedagogia curativa e per cumpetenzas linguisticas.

Il ressort perscrutaziun e svilup focusescha sias activitads sin quatter champs da perscrutaziun: plurilinguitad ed instrucziun bilingua, svilup da la scola en spazis alpins che sa midan, instrucziun che sa basa sin ICT en localitads periferas e furmaziun per in svilup persistent en il champ d’ambient e tecnica.  Il ressort da servetsch sa fatschenta cun dumondas dal svilup da scola.Surtut porschan ins a las scolas differentas furmas da sustegn per dumagnar process da svilup en scola.

Il campus da la SAPGR vegn cumplettà actualmain cun dus novs auditoris ed ina mediateca. Cun quai optimeschan ins las pussaivladads d’emprender e da scolar era en colliaziun cun la scolaziun pratica professiunala. L’accumpagnament persunal da las studentas ed dals students, il contact direct cun la pratica a partir da l’entschatta e la colliaziun d’instrucziun e scolaziun pratica professiunala èn las finamiras principalas da la SAPGR. Quellas porschan las meglras premissas per cumenzar cun success la vita professiunala pedagogica.