La SAPGR è l'unica scola auta trilingua en Svizra. I vegnan scoladas persunas d'instrucziun per la scolina e per la scola primara per las parts rumantschas, talianas e tudestgas dal chantun Grischun. A la SAPGR studegian era futuras persunas d'instrucziun dad auters chantuns che vegnan preparadas per instruir linguas estras en scolas ordaifer noss chantun.

La relaziun cun l'eterogenitad, la varietad culturala ed il plurilinguissem èn cumpetenzas-clav da la SAPGR. Perquai ha il post da stab da linguas ina impurtanza centrala per la scola. El cusseglia e coordinescha entaifer il champ linguistic ed è responsabel per tut las dumondas ed incumbensas linguisticas internas. Plinavant è el fitg activ en il champ da la perscrutaziun e svilup. Il post da stab cusseglia la direcziun en il sectur da lingua ed elavura incumbensas dal sectur linguistic sco per exempel, l'elavurar ed il translatar meds d'instrucziun. Il post da stab controllescha e garantescha la plurilinguitad durant las prelecziuns a la SAPGR. El iniziescha e coordinescha projects da perscrutaziun linguistica en il chantun.
Ultra da quai accumpogna e cusseglia il post da stab era las studentas ed ils students en dumondas dal sectur linguistic ed organisescha curs da sustegn. Tut il champ da la certificaziun da las cumpetenzas linguisticas en las segundas linguas è era part dal post da stab da linguas a la SAPGR.